KEBUMEN – Semangat gotong royong katon pisan nang lor SPBU Sempor, Kebumen, sore mau. Atusan anggota LSM Harimau sekang ngendi-ngendi ngebaki dalan, dudu arep demo utawa orasi, tapi malah arep nyapa masyarakat lewat aksi kemanusiaan sing judule "Berbagi Berkah Ramadan", Jemuah (06/03).
Nang aksi kuwe, ana sekitar 1.500 paket takjil sing didum-dum gratis nggo wong sing lagi liwat, wiwit sekang sing numpak motor, supir mobil, nganti wong mlaku sing kebetulan liwat nang jalur utama Gombong–Sempor.
Tekane Pemimpin lan Sinergi Lintas Wilayah
Kegiatan sing pusate nang Posko GSR (Gombong, Sempor, Rowokele) kiye krasa istimewa pisan merga ditekani langsung nang Ketua DPC LSM Harimau Kebumen, Bapak Toni W. Bareng-bareng karo pengurus DPC liyane, beliau mudhun langsung maring dalan nggo ngulungna paket buka puasa maring warga kanthi grapyak (humanis).
Aksi kiye asil sekang kerja bareng sing kompak antarane papat Pengurus Anak Cabang (PAC), yaiku Sempor, Rowokele, Gombong, . Guyub rukun kiye nuduhna nek organisasi kuwe pancen solid lan teyeng gerak bareng nggo kepentingane wong akeh.
> "Kegiatan kiye wujud nyatane LSM Harimau nang tengah-tengah masyarakat. Dewek kepengin mestikna sedulur-sedulur dewek sing isih nang ndalan pas adzan Magrib tetep teyeng mbatalna puasa nganggo panganan sing pantes," ujare Toni W., Ketua DPC LSM Harimau Kebumen, pas lagi sela-sela kegiatan.
Tertib lan Ngewei Contoh Apik
Senajan sing melu ana atusan anggota lan paket sing didum ana ewonan, acarane tetep mlaku tertib banget. Bocah-bocah LSM Harimau pada sigap nggone ngatur lalu lintas supaya ora macet nang ngarep SPBU Sempor.
Pembina LSM Harimau, Harjito, nambahi nek paket sing isine jajanan karo wedang seger kuwe muga-muga teyeng mbantu para musafir. "Kiye simbol semangat kebersamaan dewek nang wilayah GSR . Dewek kepengin mbusak cap elek (stigma negatif) lan mbuktekna nek ormas kuwe teyeng dadi penggerak keapikan," tegese dheweke.
Aksi sing rampung pas meh buka puasa kiye nampa jempol lan apresiasi sekang warga.
Sikap ramah lan santun sing dituduhna anggota LSM Harimau dadi bukti nek saiki wajah ormas kuwe luwih merakyat lan perduli karo wong cilik.
Plubiser:red
