GOMBONG, blackasoetakebumen.com - Suara donga lan gema selawat bakalan ngebaki langit Gombong akhir pekan kiye. Pondok Pesantren Bilingual An-Nahdliyah 5 lagi nyiapna acara gede sing paling dienteni saben taune, yaiku *Haflah Tasyakuran Akhirussanah lan Khotmil Kutub,Acara kiye dadi puncake perjuangan para santri sing wis thuyul-thuyul sinau ilmu agama lan basa sedurunge genep setaun ajaran.
Acara sing arep dianakna dina *Setu mbengi, 2 Mei 2026*, molai jam 19.00 WIB kiye udu mung sekadar seremonial kelulusan biasa. Pihak pesantren nggemas acara kiye dadi ajang silaturahmi akbar sing ngumpulna wali santri, alumni, lan masyarakat umum neng siji majelis ilmu sing adem lan nentremna ati.
Sing nggarai tambah istimewa neng acara taun kiye, yaiku rawuhe KH. Ubaidillah Shodaqoh sing bakalan menehi tausiyah utawa wejangan agama. Rawuhe beliau sing dadi Rois Syuriah PWNU Jawa Tengah sekaligus Pengasuh Pondok Pesantren Al-Itqon Bugen Semarang, diarep-arep bisa dadi "tombo ati" lan nambah semangat spiritual nggo kabeh jemaah sing teka.
Panitia acara negasna nek filosofi utama acara kiye yakuwe nggo nyelarasna antarane pintere pikiran (intelektual) lan apike budi pekerti (adab). Kaya unen-unen sing dadi cekelane pesantren:
"Ilmu tanpa adab kuwe kaya geni ora ana kayune, nek adab tanpa ilmu kuwe kaya ruh ora ana jasade."
Udu mung prosesi wisuda utawa rampungan ngaji kitab (khotmil kutub), acara kiye uga dadi bukti nek santri jaman siki tetep pengkuh njaga tradisi ilmu pesantren senajan jamane wis sarwa modern.
Masyarakat sing teka diarep-arep bisa ngalap berkah sisan menehi dukungan nggo para santri sing lagi dadi "penjaga gawang" literasi klasik kiye.
Nggo sedulur kabeh sing kepengin ngrasakna ademe majelis ilmu kiye, lawang *Pondok Pesantren Bilingual An-Nahdliyah 5 Gombong menga amba nggo sapa bae. Rawuhe panjenengan kabeh dadi wujud apresiasi nyata nggo dunya pendidikan pesantren sing terus istikamah nyetak generasi sing nduwe karakter lan akhlakul karimah.
Red:wal
