Ayah Blackasoetakebumen.com ORA ngapak ORA kepenak – Langkah nyata nggo njaga ketentremane lingkungan dilakoni nang jajaran Polsek Ayah bareng-bareng karo TNI lan masyarakat. Siji panggonan sing jare sering nggo totoan sabung pitik karo judi dadu nang Desa Candirejo, Kecamatan Ayah, Kabupaten Kebumen, Jawa Tengah, resmi dibongkar total.
Kapolsek Ayah, AKP Diyono, mandegani langsung jalane reresik nang lokasi kedadean. Nang katerangane, beliaune nyampekna angger tindakan mbongkar kiye dadi wujud respon cepet pol-polan merga anane laporan karo rasa resah sekang warga sekitar sing pengin wilayahe resik, bebas sekang penyakit masyarakat.
"Kiye wujud respon cepet merga warga wis emoh panggone nggo maksiat," jare Kapolsek.
Proses mbongkar bangunan sing asline mung semi permanen kuwe dilakoni kanthi cara gotong royong utawa sambatan , sing melu mudun ana personel Bhabinkamtibmas, Babinsa, karo warga kono. Merga kabeh elemen warga lan aparat kompak, kegiatane mlaku kanthi aman, tertib, lan blas ora ana sing wani nolak utawa maido.
Miturut katerangan sekang pihak kepolisian, panggonan kuwe jebule digawe tanpa izin (ilegal) nang nduwur tanah sing dudu nggone wong sing nduwe acara totoan kuwe. Sing dibongkar kuwe fokus maring tatanan pring-pring karo tenda sing biasa nggo nggon ngumpul wong akeh.
Aparat negasna angger sakwise dibongkar kiye, pengawasan nang area Desa Candirejo pan dadi luwih dipenet lan diperketat nggo njaga mbok menawa ana sing arep mbaleni kegiatan kaya kuwe maning. Pihak Polsek Ayah uga ngaturna maturnuwun lan apresiasi sing setinggi-tinggine nggo dhukungan penuh sekang warga sing milih dalan tertib hukum nggo ngrampungi potensi gangguan kamtibmas nang lingkungane.
Tekan berita kiye diunggahna, kahanan nang sekitar lokasi dilaporna wis bener-bener aman lan kondusif banget. Warga dijaluk tetep proaktif lan *cekat-ceket* aweh informasi maring pihak sing berwajib angger nemu tandha-tandha anane kegiatan sing nabrak hukum demi kenyamanan bareng-bareng.
Plubiser Red
