Blackasoetakebumen.com ORA ngapak ORA kepenak Kebumen Jumat 26 Juni 2026 – Anggota DPRD Kabupaten Kebumen sekang Fraksi PAN, Kurniawan, nggelar agenda reses masa sidang III taun 2026 nang Pendopo Kecamatan Prembun, dina Jemuwah (26/6). Pertemuan penting kiye ditekani karo jajaran Forkopimcam Prembun, kayata Camat Prembun, Kapolsek Prembun, perwakilan Koramil Prembun, lan Sekretariat DPRD Kabupaten Kebumen. Ora ketinggalan, teka uga puluhan Kepala Desa lan mayoritas anggota BPD sekang Dapil VII sing ngliputi Kecamatan Ambal, Mirit, Prembun, Bonorowo, lan Padureso.
Acara dibuka kanti khidmat, diwiwiti dongonan lan nembang lagu Indonesia Raya. Nang sambutane, Camat Prembun, Toro, ngaturaken rasa matur nuwun banget merga Kurniawan wis milih Kecamatan Prembun dadi panggonan nggo nampung aspirasi warga. Pihak kecamatan seneng banget karo inisiatif iki sing dadi jembatan komunikasi antarane pemerintah daerah karo warga nang desa.
Nang pemaparane, Kurniawan negasna pentingé transparansi lan ketepatan sasaran nggo rencana pembangunan taun 2027. Dheweke wanti-wanti nek saben usulan sing metu sekang reses kudune bener-bener dadi kebutuhan mendesak warga, dudu mung sekadar karep. Kurniawan menehi contone, perbaikan dalan utama desa kuwe luwih penting nggo ekonomi lokal ketimbang ndandani fasilitas liyane sing durung pati dibutuhna.
Luwih lanjut, Kurniawan ngajak warga ngiyatna ekonomi lewat optimalisasi koperasi nang saben desa. Dheweke nyoroti pentingé sistem simpan pinjam sing sehat supaya petani ora terus-terusan kegeret karo rentenir. Kanti pemetaan kebutuhan sing adhedhasar data riil, diarep-arep koperasi bisa dadi penggerak ekonomi nggo kesejahteraan warga.
Ora mung pembangunan fisik lan ekonomi, Kurniawan uga ngelingna pentingé kesehatan mental lan sosial nggo perangkat desa lan masyarakat. Kanti tema *Sehat Otak, Sehat Jiwa lan Raga*, dheweke ngajak kabeh sing teka, khususé pengurus BPD lan perangkat desa, supaya luwih wicaksana nganggo media sosial lan aja gampang kepancing isu. Dheweke ngajak supaya saben kritik marang pemerintah daerah kuwe kudune objektif, konstruktif, lan ana dhasaré sing jelas.
Acara mlaku interaktif lan warga semangat banget, khususé pas diskusi soal teknis anggaran desa lan pentingé sinergi antarane BPD karo pemerintah desa. Kurniawan negasna nek sinergitas kuwe penting banget supaya saben program pembangunan bener-bener bisa dirasakna manfaaté karo masyarakat luas.
Diarep-arep, kabeh aspirasi sing wis dikumpulna nang kegiatan iki bisa dikawal kanti apik nang proses rencana RKPD, demi mujudna kemajuan sing rata nang wilayah Kabupaten Kebumen.
Jurnalis Ais
