GOMBONG, KEBUMEN – Tabir peteng sing nutupi mandeke bantuan Program Keluarga Harapan (PKH) nggone Ibu Sartini (71), lansia saking Desa Wonokriyo, siki mlebu babak anyar sing kebak kejanggalan.
Penjelasan teknis sekang Koordinator PKH Kecamatan Gombong jebule "tabrakan" karo bukti fisik mutasi rekening nggone Keluarga Penerima Manfaat (KPM).
Alibi Dana Hangus:
Beneran Apa Alasan?
Koordinator PKH Gombong ngakoni nek bantuan macet merga data "Jeneng Ibu Kandung" ora sinkron antarane sistem karo Dukcapil. Akibate, proses pengalihan bantuan sekang Kantor Pos maring Bank dadi gagal total.
Pendamping nembe dandani data tanggal 31 Desember 2025. Sing dadi masalah, pihak otoritas ngeklaim nek dana sing ora dijupuk KPM nganti batas wektu tartamtu, otomatis ditarik bali maring Kas Negara.
> "Dana per 31 Desember wingi sing ora dijupuk, otomatis ditarik bali maring negara," ujare Koordinator PKH maring media.
Kejanggalan Fatal: Misteri Transaksi "Sandi 99"
Pernyataan "dana ditarik negara merga ora dijupuk" siki dadi tanda tanya gedhe. Wong-wong padha nggumun (heran) bareng ndeleng buku tabungan Bank Mandiri nggone Bu Sartini:
* Debet Gasik: Ana transaksi penarikan Rp900.000,00 tanggal 23 Desember 2025. Padahal klaim PKH, dana nembe hangus tanggal 31 Desember. Lha terus, sing 8 dina sadurunge kuwi dhuwite sapa sing njiot?
* Sandi "99" Sing Misterius: Kode sing metu kuwi "99". Nang buku tabungan Mandiri, kode 99 artine "Lain-lain".
* Anomali Waktu: Nek dhuwit ditarik negara merga kadaluwarsa per 31 Desember, ngapa saldo wis dadi Rp0 (Zonk) wiwit tanggal 23 Desember?
Analisis Kritis: Celah Sistem Apa Kelalaian Oknum?
Metune sandi "99" (Lain-lain)—dudu kode retur resmi negara utawa penarikan tunai biasa—ndadekake wong curiga ana "transaksi abu-abu" nang mburine KPM. Kasus iki nengeri telung titik merah tata kelola bansos nang Gombong:
* Omongane Mencla-mencle: Ana jurang amba antarane klaim pendamping (balik negara 31 Des) karo kasunyatan mutasi bank (duit metu 23 Des).
* Kerjane "Keri": Dandani data nembe pas akhir tahun (31 Desember). Iki bukti nek penanganane nunggu rame nembe obah, padahal Bu Sartini wis suwe kelangan hake.
* Takon Maring Bank: Apa sejatine definisi sandi "99" nggo kasus bansos? Apa kuwi sistem otomatis, apa ana tangan-tangan "kreatif" sing mindahbukukan manual?
Kesimpulan: Aja Nganti Wong Cilik Dadi Korban Administrasi
Kasus Bu Sartini dudu mung perkara salah nulis jeneng ibu kandung. Iki soal transparansi dhuwit rakyat. Nek bener dhuwit kuwi bali maring negara, kudune ana bukti setoran resmi (SSP) sing tanggale padha karo sing nang buku tabungan.
Keluarga siki nuntut kajelasan. Wong Gombong ora gelem mung diwei janji utawa alasan administrasi sing mbulet.
> "Aja nganti hake wong lansia sing wis sepuh malah dadi dolanan sistem. Dhuwit sakmono gedhe banget nggo simbah-simbah, aja nganti menguap dadi angin!"
Plubiser:Red
